ضربات الجزاء الترجيحية

جلال چرمگاجلال چرمگا

ضربات الجزاء الترجيحية

ضربات الجزاء الترجيحية اثناء فترة الطفولة لابل وحتى فترة الشباب كأكثرية ألأولاد مارسنا الرياضة وبالأخص تلك اللعبة الشعبية التي تمارس في انحاء المعمورة على نطاق واسع.. بأختصار جدا.. كرة القدم ...

حتى بعد أن تركنا الملاعب وتحولنا الى صفوف المشجعين ، حفظنا قوانين اللعبة على ظهر قلب وكأننا أختصاصيون باللعبة..

كرة القدم أوسع لعبة في كل العالم وبين شعوب العالم.. يمارسها الكثيرون ومن هواتها الملايين من الجنسين وفي مختلف ألأعمار.. انها لعبة سحرية بحق.. ياما كانت ألأحوال الجوية سيئة مع ذلك عشاقها تعنوا وواجهوا الطقس وحضروا الى الملاعب لمشاهدة وتشجيع فريقهم المفضل.. وهذه ليست جديدة..

الحكومات التي تحترم الشباب وتهتم بمواهبهم تراهم يشيدون ملاعب عجيبة وغريبة وواسعة ..ألأمثلة كثيرة ودول الخليج دليل قاطع على كلامنا.. ففي دولة / قطر ملاعب لاتوصف.. مبروك عليهم .

اما الحكومات التي لاتهتم ولا بطيخ ( زي حكومتنا المنتخبة ديمقراطيا!!).. لااااء هذه شكل تاني!!.

غريبة توجهات ( حمدان البغدادي).. اليوم قريحته كلها نحو كرة القدم.. ملاعب.. قوانين اللعبة!!..أعتقد أن كأس العالم قد اثر عليه وأمسى ( يخبط ) الرياضة بالسياسة من غير وعي .. تمام حمدان ؟؟؟.

ـ اكيد لاء.. صحيح احب مشاهدة كرة القدم ولكن لي قصد..

+ نورنا..

ـ ليش لاء.. شوف .. في كرة القدم وفي حالات التعادل.. نعني بعد الوقت ألأصلي والوقت ألأضافي.. يلجأ الحكام الى ( ضربات الجزاء الترجيحية ) .. تمام ؟؟.

+ تمام.. بس هم ما أفتهمت!!!.

ـ راح تجيك.. بس أصبرلي.. قصدي:

لعبة ديمقراطيتهم العرجاء.. بين كتلة ـ اياد علاوي ـ وكتلة السيد / المالكي .. وواحدهم يتصور بأنه هو ألأحق في تشكيل الحكومة ..هذه جيب ليل وخذ عتابه.. وألأهم ضعف بقية المسئولين وانشغالهم بأمورهم الحزبية والخاصة(رواتب مخصصات ، نثرية) قد تجعل العملية اطول واطول.. ياترى وين هو / رئيس الجمهورية من هذه المهزلة؟؟.. ياترى بأي بلد حدث ويحدث ما يحدث في عراقنا اليوم؟؟؟؟... الجميع ساكتين والجماعة يوم علاوي يزور المالكي.. ويوم بالعكس.. يتعانقون والكامرات تشتغل ألأف صورة بفلس.. كلها تبتسم .. ياجماعة والنتيجة؟؟؟؟؟؟؟؟؟؟؟... والشعب؟؟ والناس؟؟ وكلام العالم؟؟ .. يعني بالعراق العظيم ماكو غير هالأثنين؟؟.. خلت الساحة؟؟ لو هم لو نظل بلا حكومة؟؟؟.

+ كلامك منطقي.. يعني شلون؟؟ عندك حل؟؟؟.

ـ عندي حل محترم ويرضي الجميع ومحد ينغدر!!!.

+ على بختك / حمدان.. گولها.. احچيها..

ـ ليش لاء.. اني اگول لازم يجربون / ضربات الجزاء الترجيحية... نعم لكون الوقت ألأصلي وألأضافي وفوكاها أضافي واضافي اخر انتهى ماكو غير چارة.. على شرط ان يكون الكولچي( حارس المرى) هما الدكتور / علاوي والسيد/ المالكي.. وكل طرف يختار خمس لاعبين بشرط ان لايكون معمم .. ويتوكلون على الله وتحسم النتيجة...

+ زين... وإذا تعادلوا؟؟؟؟.

ـ بسيطة يلعبون ( طرة وكتبة )...

+ حمداااااان.. وين اكو فلوس معدنية حتى يلعبون ( طرة كتبة )؟؟.

ـ اكو ونص.. العملة الأمريكية .. قابل اكو ادرهم لو العشر فلوس.. اليوم امريكا هي راعية العملية السياسية بالعراق.. ماتشوف حالنا.. بالعظيم ألأدارة ألأمريكية تركص للحالة بجفافي ملونة!!.

+ حمدان .. انت ظل صنف.. واني اريد ابچي على وطني واهلي وناسي.. حرام عليك.. ليش؟؟.

ـ أني؟؟.. ليش ماتلوم سياسي اخر زمان اللي واحدهم مايتنازل عن الكرسي لو يجي مادري شنو...؟؟.

+ انطينا الحل.. !!

ـ ماكو حل..حتى/ مام جلال امسوي نفسه الشغلة مو يمة وامفضل السكوت .. هاك بالشهر ثلاثة اسابيع منها بالسليمانية لرعاية حزبه واسبوع في بغداد وهالأسبوع عزائم وسهر وأستقبال وتوديع .. رئيس برلمان ماكو.. الساحة فارغة.. بأختصار ماكو واحد يأثر.. كلها تريد مصالح.. والشعب مثل ماتشوف انطى صوته وينتظر..

+ شينتظر...؟؟.

ـ شوية كهرباااااااااااااء.. والحصة التموينية.. اكو غير شىء؟؟؟.

+ لا والله حمدان ماكو غيرشىء.. اللهم احفظ العراق وشعب العراق..

ـ آمين يارب العالمين ..