تنبؤات العتوي العراقي ( لويس ) !

حجم الخط: للكاتب صالح الحمداني
العتوي العراقي ( لويس )

عندي عتوي بالبيت ، بس شلون عتوي : أسود هندس ، معتور ، عتوي مطابخ مضبوط . مسمينه ( لويس ) ، ولويس هذا يفتر ليليه على كل البيوت اللي بالمنطقه ،
وبعدين ياخذله خوطه بالحاويه اللي براس الشارع ، يشمشم بقواطي ( الهنكن ) مالات جيرانه السماج ( باسم سمكه ) ، وبعدين يرجع لبيتنا يكلب صطلة الزباله مالتنا ، ويروح ينام بالحديقه ، بصف المبرده .
البارحه ، فكرت ليش ما أطبق خطة الأخطبوط الألماني ( بول ) على العتوي العراقي الفدرالي الأتحادي الدستوري ( لويس ) ، وأخليه يتنبأ إلنه ، منو راح يصير رئيس وزراء العراق القادم ، بلكي تلجح عده ، ويتنبأ صح ، ويطك ، ويصير مشهور ، وياخذني وياه لعالم الشهره والملايين ، وتصير عدنه طياره خاصه مثل ( حازم الشعلان ) الله يذكره بالخير ، ونفتر آني ولويس بكل دول العالم ، ونشبع تكه و ( هنكن ) .
حضرت مواعين اثنين ، لزكت بالأول صورة واحد ببالي مرشح لرئاسة الوزراء ، وخليت بالماعون نص راس السمجه اللي شويناها اليوم الظهر لصديقي ( مفيد ) اللي أجانه خطار من بغداد الحبيبه ، أما الماعون ( اللاخ ) فلزكت بيه صورة واحد ببالي غير ذاك الواحد المذكور في أعلاه ، وهو هم مرشح قوي لرئاسة الوزراء ، وخليت بالماعون نص راس السمجه الثاني مالت ( مفيد ) .
حطيت المواعين يم صطلة الزباله ، بالعشره إلا ربع مساء ، وظليت أباوع من الشباج ، وأنتظر أستاذ ( لويس ) ، يرجع من الدوام المسائي ، كما هو معتاد في كل ليله .
بالعشره ضبط : طب أبو اللوس يتطوطح ، ومرتاح ، شكيت ( باسم سمكه ) ناسيله نص ربع بقوطية ( هنكن ) ، وصاحبنه لطعهن وإجاني . طبعا راح كبل على المواعين ، باوع على الصور ، أفتر عليهن ، شمشم بيهن ، وكعد على حيله وصفن ، وآنه أراقبه من الشباج ، بهدوء وسرية تامه ، تدرون مصير البلد كله صار بيد ( لويس ) .
( لويس ) ظل صافن على الصور ، مدري شجاه ، وفجأه : كام وبال بالمواعين إثنيناتهن ، وغركن الصور ، وراس السمجه ، وكلب صطلة الزباله ، وراح العرينه ينام . طبعا ما راح أكللكم منو أول ماعون بال بيه ، بس الله لا يجذبني ، يمكن لويس يتوقع محد منهم يصير ! .
في أمان الله .